Ymweliad a Cartref Plant yn Legnicia, Gwlad Pwyl, Ebrill 2001

Ar fore’r 4ydd o Ebrill roedd pawb yn brysur yn llwytho bws mini Gwersyll Llangrannog ar gyfer y daith 20 awr i Legnica, Gwlad Pwyl. Ar ôl wythnosau o godi arian, dros £4000 i gyd, roeddwn yn barod i gychwyn ein taith i gartref plant yn Legnica.

Beth oedd pwrpas y daith?
Yn syml roeddwn am fynd allan i aros mewn cartref i 67 o blant amddifad gyda’r bwriad o gymdeithasu, gwneud ffrindiau newydd a gwneud ychydig o waith gyda’r £4000 y codwyd. Wrth i’r bws mini gyrraedd y cartref sylweddolom yn syth bod eu croeso yn mynd i fod yn arbennig o gynnes.

Roedd y plant yn blant amddifad ac roedd gan y cartref £10 y mis i ddilladau, bwydo ac addysgu’r plant. Er hyn roedd eu croeso a’u cyfeillgarwch yn arbennig. Cyn hir roeddent wedi dysgu criw yr urddaholics i gyfri ym Mhwyleg ,dweud helo, shwmai, nos da, diolch ac yn y blaen. Roeddent hyd yn oed yn ein dysgu i ganu (wel…trio canu ta beth!)

Hoffai criw yr Urddaholics ddiolch i bawb a wnaeth helpu gyda’r codi arian. Llwyddwyd i brynu cegin gyfan iddynt, cyfrifiaduron, peiriant llun gopïo, paent a rhoddion. Yn ogystal a hyn byddwn yn gallu eu gwahodd yn ôl i Langrannog dros yr haf.

Ar ôl y daith nododd un o’r Urddaholics:
"Wna i byth gymryd dim byd yn ganiataol eto."
Dyna oedd y teimlad cyffredinol ar ôl y daith gan bawb.

Profiad bythgofiadwy a’r gobaith yw cyflawni taith debyg yn y dyfodol agos.