Croeso i daflen athrawon Bore Da mis Ebrill 2006
Croeso! Dyma awgrymiadau ar sut i ddefnyddio
Bore Da mis Ebrill ymhellach yn y dosbarth.
Themâu mis Ebrill ydy dillad, y corff,
Ffŵl
Ebrill
a salwch.
Cyn dangos Bore Da i'r plant holwch nhw pa siwpyr-arwr ydi eu ffefryn. Sawl arwr maen nhw'n gallu eu henwi? Dywedwch bod llun un o'r arwyr hyn ar glawr Bore Da, a chynhaliwch bleidlais i weld faint o'r plant sy'n dyfalu'n gywir mai Spiderman sydd ar y clawr.
Ar ôl darllen am Spiderman yn Bore Da gall y plant wneud poster yn rhoi sylw i un arall o'r siwpyr-arwyr. Dywedwch wrthynt ysgrifennu ychydig o frawddegau o dan y poster yn disgrifio gwisg yr arwr.
Tudalen 2 Celt y Ceiliog
Ar ôl darllen y cartwn, beth am gynnal diwrnod gwisgo dillad eu hun yn yr ysgol, a chreu sioe ffasiynau yn y dosbarth. Gallwch rannu'r plant yn grwpiau, a byddai pob grp yn gyfrifol am ysgrifennu sgript ar gyfer pawb yn eu grŵp nhw.
Tudalen 3 Gweithlen 1 Dillad
Ar ôl gwneud y weithlen dywedwch wrth y plant rannu'n barau, ac ysgrifennu beth mae eu partner yn wisgo, gan wneud llun ohono/i hefyd. Yna dylai pob plentyn ddilyn y patrwm yn y weithlen, gan dynnu llun person dychmygol ac ysgrifennu dau ddisgrifiad, un yn gywir a'r llall yn anghywir. Casglwch y cyfan a naill a'i mynd trwy'r lluniau gyda'r dosbarth cyfan, neu rannu'r dosbarth yn grwpiau a rhoi tri neu bedwar o'r posau i bob grwp eu datrys.
Tudalen 4 5 Dei Diog
Rhowch gopïau o gartwn Dei Diog i bob grwp, a thaflen ar wahân gyda'r testun (ddim yn y drefn gywir). Tasg y plant ydi penderfynu pa destun sy'n mynd i ba flwch.
Tudalen 6 7 Annwyl Celt y Ceiliog
Mae croeso i chi anfon llythyron gan blant eich ysgol i Bore Da, a byddwn yn siwr o gyhoeddi rhai ohonynt yn ystod y flwyddyn ysgol newydd. Gallwch ysgrifennu llythyron cyffredinol, neu ddilyn un o'r themâu sy'n cael eu rhestru ar y daflen amgaeëdig.
Tudalennau 11 Posau a Gwobrau
Anfonwch y posau at Bore Da, Swyddfa'r Urdd, Ffordd Llanbadarn, Aberystwyth, SY23 1EY erbyn 1 Mai. Mae llu o wobrau i'w hennill a bydd enw’r enillwyr a’r ysgol yn ymddangos yn Bore Da.
Tudalen 12
Rho gynnig ar… wneud cwpan ŵy
Rhowch gopi o'r dudalen wedi ei llungopïo, heb y testun, i'r dysgwyr mwyaf hyderus - ond gadewch y rhestr deunyddiau ar y dudalen. Esboniwch bod y dudalen yn dangos sut i wneud cwpan ŵy. Dywedwch wrthynt edrych ar y lluniau a dyfalu beth ydi'r cyfarwyddiadau o dan bob un, a'u hysgrifennu yn Saesneg. Yna darllenwch y cyfarwyddiadau Cymraeg. Dylai'r plant ei chael yn haws i'w deall gan eu bod eisoes yn hanner gwybod beth i'w ddisgwyl yn y testun.
Tudalen 14 15 Criw'r Bys Stop
Rhannwch y dosbarth yn bedwar grwp. Rhaid i bob grwp actio chwarter y stori. Rhaid iddyn nhw benderfynu pwy sy'n actio'r cymeriadau, pwy sy'n cyfarwyddo, a gall gweddill y grwp actio gweddill y dosbarth. Efallai byddai cael bathodynnau gydag enwau'r cymeriadau yn syniad da. Ar ôl rhoi cyfle i'r grwpiau ymarfer gallwch gynnal perfformiad o'r stori yn y dosbarth.